ՀՀ դեսպանի մամուլի ասուլիսը

25 սեպտեմբերի, 2016

Սեպտեմբերի 25-ին Իրանի Իսլամական Հանրապետությունում Հայաստանի Հանրապետության դեսպանության կողմից կազմակերպվել է մամուլի ասուլիս, որի շրջանակներում դեսպան Արտաշես Թումանյանն իրանական հեղինակավոր զանգվածային լրատվամիջոցներին է ներկայացրել Հայաստան-Իրան քաղաքական, տնտեսական և մշակութային կապերի ամրապնդման հետ կապված խնդիրներն ու իրականացվող աշխատանքը: Հանդիպմանը մասնավորապես ներկա են եղել «Farsnews.com», «Irna.ir» «Isna.ir», «Mehrnews.com», «Tasnimnews.com», «Ir.diplomacy.ir» և այլ լրատվական համացանցային ռեսուրսների, ինչպես նաև ռադիոյի և օրաթերթերի («Jamejam», «Forsat-e Emrooz», «Shargh» և այլն) լրագրողներ:
Դեսպան Արտաշես Թումանյանը ներկայացրել է երկկողմ առևտրի և փոխադարձ ներդրումների ակտիվացմանը նպաստող Հայաստանի Հանրապետության օրենսդրությունը, գործող առևտրային ռեժիմները, Եվրասիական տնտեսական միության անդամակցությամբ Հայաստանին ընձեռնված հնարավորությունները, Եվրամիության և այլ երկրների հետ ունեցած առևտրային արտոնությունները:
Իրանական լրատվամիջոցներին ներկայացվել են Հայաստանի տնտեսության վիճակը բնութագրող միջազգային առաջատար կազմակերպությունների գնահատականները (Համաշխարհային բանկի «Doing Business» միջազգային խմբի 2016 թ. զեկույցում Հայաստանն աշխարհի 189 երկրների շարքում զբաղեցրել է 35-րդ տեղը, իսկ կանադական հայտնի «Fraser Institute»-ի աշխարհում տնտեսական ազատություններին նվիրված ս.թ. տարեկան զեկույցում 159 երկրների շարքում զբաղեցրել է 18-րդ հորիզոնականը):
Իրանում Հայաստանի Հանրապետության դեսպանը մանրամասն տեղեկատվություն է տրամադրել Թեհրանում ս.թ. հոկտեմբերի 5-8-ին կայանալիք «Armenia Expo 2016» հայկական ապրանքների և ծառայությունների մասնագիտացված ցուցահանդեսի մասին, որին մասնակցելու հայտ են ներկայացրել 90-ից ավելի հայկական ընկերություններ (տեղեկատվական տեխնոլոգիաներ, բանկեր, ապահովագրություն, գյուղատնտեսություն, սննդի արտադրություն, ոսկերչություն, ադամանդագործություն, դեղագործություն, կարի, կոշիկի և կաշվե իրերի արտադրություն և այլ ոլորտներ):
Դեսպան Արտաշես Թումանյանի կողմից լրատվամիջոցների ներկայացուցիչներին ուղղված առաջարկություն է հնչել՝ աջակցել ցուցահանդեսին իրանական գործարար շրջանակների ակտիվ մասնակցության գործում: Ասուլիսի ընթացքում ՀՀ դեսպանը պատասխանել է լրագրողների բարձրացրած բազմաթիվ հարցերին:
Մամուլի ասուլիսը լայնորեն լուսաբանվել է իրանական պարսկալեզու և անգլիալեզու ԶԼՄ-ներում:

Մամուլի ասուլիսի տեսանյութը դիտելու համար սեղմել այստեղ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր