«Իրան-Հայաստան բարեկամություն» միության նախագահը հանդիպեց դեսպան Արտաշես Թումանյանի հետ

10 հոկտեմբերի, 2016

Ս.թ. հոկտեմբերի 10-ին «Իրան-Հայաստան բարեկամություն» միության նախագահ Մոհամմադռեզա Դամավանդիի նախաձեռնությամբ տեղի է ունեցել հանդիպում Իրանի Իսլամական Հանրապետությունում Հայաստանի Հանրապետության արտակարգ և լիազոր դեսպան Արտաշես Թումանյանի հետ:
Մոհամմադռեզա Դամավանդին մեծ գոհունակություն է հայտնել Իրանում Հայաստանի Հանրապետության դեսպանության կողմից կազմակերպված «Հայաստան էքսպո 2016» ցուցահանդեսի բարեհաջող անցկացման կապակցությամբ:
Ըստ Դամավանդիի՝ ցուցահանդեսի նախապատրաստման և անցկացման ընթացքում դեսպանության կողմից իրականացված լայնածավալ աշխատանքը մեծ արդյունքների է հանգեցրել, որի ապացույցն է իրանական գործարար շրջանակներում առաջացած աննախադեպ հետաքրքրությունը:
Դեսպան Արտաշես Թումանյանը հայտնել է, որ Իրանում Հայաստանի Հանրապետության դեսպանությունը Հայաստանի պետական մարմինների և գործարար շրջանակների, ինչպես նաև իրանական կողմի համապատասխան կառույցների հետ համագործակցելով հետևողականորեն շարունակելու է Հայաստան-Իրան տնտեսական կապերի աշխուժացմանն ուղղված քայլերը, և այսօր ստեղծված դրական մթնոլորտն առավելագույն արդյունավետությամբ ծառայեցվելու է այդ նպատակներին:
«Իրան-Հայաստան բարեկամություն» միության նախագահն իր կողմից հավաստիացրել է, որ իրենք պատրաստ են համակողմանի աջակցություն ցուցաբերել նշված խնդիրների լուծման գործում:
Հանդիպման ընթացքում քննարկվել են Հայաստան-Իրան հարաբերություններին առնչվող այլ հարցեր ևս:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր