Միջկառավարական համատեղ հանձնաժողովի 14-րդ նիստը Թեհրանում

05 դեկտեմբերի, 2016

Դեկտեմբերի 4-5-ին Թեհրանում տեղի ունեցավ հայ-իրանական միջկառավարական համատեղ հանձնաժողովի 14-րդ նիստը: Հայկական պատվիրակությունը գլխավորում էր ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը:
Այցի շրջանակներում հայկական պատվիրակությունը հանդիպեց ԻԻՀ առաջին փոխնախագահ Էսհաղ Ջահանգիրիի, ԻԻՀ արդյունաբերության, հանքերի և առևտրի նախարար Մոհամմադռեզա Նեմմաթզադեի և ԻԻՀ էներգետիկայի նախարար Համիդ Չիթչիանի հետ: Հայ-իրանական երկօրյա քննարկումների արդյունքում ստորագրվեց «Հայ-իրանական միջկառավարական հանձնաժողովի 14-րդ համատեղ նիստի փոխըմբռնման հուշագիրը», ձեռք բերվեցին մի շարք պայմանավորվածություններ:
ԻԻՀ առաջին փոխնախագահ Էսհաղ Ջահանգիրիի հետ հանդիպման ժամանակ կողմերը քննարկեցին «Հյուսիս-հարավ միջազգային տրանսպորտային միջանցք» նախագծին, Հայաստան-Իրան 3-րդ բարձրավոլտ էլեկտրահաղորդման գծի շինարարությանը, Արաքս գետի բնապահպանական վիճակին, առևտրաշրջանառության ծավալների մեծացմանը, զբոսաշրջության խթանմանը, մշակութային կապերի ընդլայնմանն առնչվող հարցեր:
ԻԻՀ արդյունաբերության, հանքերի և առևտրի նախարար Մոհամմադռեզա Նեմմաթզադեի հետ քննարկումների շրջանակներում առանձնակի կարևորություն տրվեց բանկային և հանքարդյունաբերության ոլորտներում համագործակցության զարգացմանը: Քննարկվեցին նաև համագործակցության այլ ուղղություններ:
ԻԻՀ էներգետիկայի նախարար Համիդ Չիթչիանի հետ հանդիպման ընթացքում կողմերը քննարկեցին երկկողմ տնտեսական համագործակցության վերաբերյալ հարցերի լայն շրջանակ, այդ թվում՝ Հայաստան-Իրան-Վրաստան էլեկտրաէներգետիկ միջանցքի, Մեղրիի և Ագարակի բնակավայրերի գազաֆիկացման, Մեղրիի ՀԷԿ-ի շինարարության խնդիրները և այլն:
Հայկական պատվիրակությունը Թեհրանի «Արարատ» մարզամշակութային համալիրում նաև մասնակցեց ԻԻՀ-ում ՀՀ դեսպանության կազմակերպած հանդիպմանը հայ համայնքի ներկայացուցիչների հետ: Հայկական պատվիրակությունը և իրանահայ համայնքի ներկայացուցիչները քննարկեցին Հայաստան-Իրան տնտեսական հարաբերությունների զարգացմանը և այլ հարցերի առնչվող բազմաթիվ խնդիրներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր