Դեսպան Թումանյանի հանդիպումը «Rahpouyan J.S. Co.» ընկերության ներկայացուցչի հետ

22 հունվարի, 2017

ԻԻՀ-ում ՀՀ դեսպանությունում ս.թ. հունվարի 22-ին արտակարգ և լիազոր դեսպան Արտաշես Թումանյանն ընդունեց ջերմոցների արտադրության ոլորտում մասնագիտացած «Rahpouyan J.S. Co.» ընկերության տնօրենների խորհրդի նախագահ Ղոլամհոսեյն Խաջե Թաբրիզիին:
ՀՀ դեսպանը բացատրություններ տվեց ՀՀ տնտեսության վիճակի, գյուղատնտեսության ոլորտի զարգացումների, գործող առևտրային ռեժիմների (ԵԱՏՄ, «GSP») և գործարար միջավայրի առավելությունների վերաբերյալ: Նա առանձին անդրադարձ կատարեց Մեղրիի ազատ տնտեսական գոտուն:
Ղոլամհոսեյն Խաջե Թաբրիզին ներկայացրեց ընկերության գործունեության ընդհանուր ուղղությունները՝ նշելով, որ «Rahpouyan J.S. Co.» ընկերությունն Իրանում տարեկան կառուցում է շուրջ 150 հա ջերմոցներ: Ըստ նրա՝ ընկերությունն ունի իր մշտական հաճախորդները Ռուսաստանում, Ղազախստանում, Թուրքմենստանում, Ուզբեկստանում և տարածաշրջանի այլ երկրներում:
Կողմերը քննարկեցին «Rahpouyan J.S. Co.» ընկերության կողմից Հայաստանում ներդրումային ծրագիր իրականացնելու խնդիրը և մասնավորապես, վերջինիս արտադրանքը ԵԱՏՄ շուկա արտահանելու հնարավորությունները:
Ընկերության տնօրենների խորհրդի նախագահն իր պատրաստակամությունը հայտնեց մոտ ապագայում ներկայացնել ՀՀ-ում տնտեսական գործունեություն իրականացնելու համապատասխան ծրագիր և խնդրեց դեսպան Արտաշես Թումանյանից աջակցել իրենց ընկերության գործունեությանը:
Դեսպանը խոստացավ օգնել «Rahpouyan J.S. Co.» ընկերությանը Հայաստանում գործարար ծրագիր իրականացնելու հարցում:
«Rahpouyan J.S. Co.» ընկերության ներկայացուցչին փոխանցվեցին Հայաստանի զարգացման հիմնադրամի տվյալները՝ Հայաստանում տնտեսական գործունեության իրականացման հետ կապված խնդիրները քննարկելու նպատակով:
Ընկերության տնօրենների խորհրդի նախագահին փոխանցվեցին տեղեկատվական նյութեր ՀՀ տնտեսության, առանձին ծրագրերի, օրենսդրության և Մեղրիի ազատ տնտեսական գոտու մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր