Դեսպանի հանդիպումը «Safinia Trading» ընկերության ներկայացուցիչների հետ

22 հունվարի, 2017

ԻԻՀ-ում ՀՀ դեսպանությունում ս.թ. հունվարի 22-ին արտակարգ և լիազոր դեսպան Արտաշես Թումանյանն ընդունեց «Safinia Trading» առևտրային կազմակերպության ներկայացուցիչներին:
Դեսպանն ընկերության ներկայացուցիչներին հանգամանորեն ներկայացրեց ՀՀ տնտեսության վիճակը, կառավարության կողմից իրականացվող քայլերը, գործող առևտրային ռեժիմները (ԵԱՏՄ, «GSP», «GSP+») և գործարար միջավայրի առավելությունները: Նա առանձին անդրադարձավ Մեղրիի ազատ տնտեսական գոտուն:
Հանդիպման ընթացքում «Safinia Trading» առևտրային կազմակերպության ներկայացուցիչ Համիդ Սաֆինիան տեղեկացրեց, որ իրենց ընկերությունը հիմնականում զբաղվում է ԻԻՀ-ից դեպի միջազգային շուկաներ հանքային արդյունաբերության մեջ օգտագործվող նյութերի արտահանմամբ: Նա նշեց, որ իրենց ընկերությունն ունի արտասահմանյան, մասնավորապես՝ եվրոպական և ճապոնական հայտնի ընկերությունների հետ մոտ 40 տարվա համագործակցության փորձ:
Դեսպան Արտաշես Թումանյանը ողջունեց ընկերության ներկայացուցիչների ցանկությունը Հայաստանում տնտեսական գործունեություն ծավալելու կապակցությամբ և խոստացավ անհրաժեշտության դեպքում աջակցություն ցուցաբերել:
Հանդիպման վերջում «Safinia Trading» ընկերության ներկայացուցիչներին տրամադրվեցին «Հյուսիս-հարավ տրանսպորտային ուղու», «Իրան-Հայաստան երկաթգծի» և Մեղրիի ազատ տնտեսական գոտու վերաբերյալ տեղեկատվական նյութեր, ինչպես նաև նրանց փոխանցվեցին Հայաստանի զարգացման հիմնադրամի տվյալները՝ Հայաստանում տնտեսական գործունեության իրականացման հետ կապված խնդիրները քննարկելու նպատակով:
Ընկերության ներկայացուցիչներին փոխանցվեցին տեղեկատվական նյութեր ՀՀ տնտեսության, առանձին ծրագրերի, օրենսդրության և Մեղրիի ազատ տնտեսական գոտու մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր