Դեսպանն ընդունեց «Telka Mobin Sanat» ընկերության ներկայացուցիչներին

22 հունվարի, 2017

ԻԻՀ-ում ՀՀ դեսպանությունում ս.թ. հունվարի 22-ին արտակարգ և լիազոր դեսպան Արտաշես Թումանյանն ընդունեց «Telka Mobin Sanat» ընկերության ներկայացուցիչներին:
Դեսպան Թումանյանը որոշակի տեղեկություններ փոխանցեց ընկերության ներկայացուցիչներին Հայաստանի տնտեսական վիճակի, գործող առևտրային ռեժիմների (ԵԱՏՄ, «GSP», «GSP+») և գործարար միջավայրի առավելությունների վերաբերյալ: Նա նաև հատուկ անդրադարձավ Մեղրիի ազատ տնտեսական գոտուն:
«Telka Mobin Sanat»-ի գործադիր տնօրեն Մոհամմադ Սուրին ՀՀ դեսպան Արտաշես Թումանյանին ներկայացրեց ընկերության գործունեության հիմնական ուղղությունները՝ նշելով, որ իրենք սերտ համագործակցում են ԻԻՀ երեք բջջային օպերատորների, կապի սարքավորումներ արտադրող «Ericsson» և չինական «ZTE» առաջատար ընկերությունների հետ:
«Telka Mobin Sanat» ընկերության գործադիր տնօրենը հետաքրքրվեց Հայաստանում գործունեություն ծավալելու հեռանկարների մասին՝ նշելով, որ ընկերությունը մտադրություն ունի գործունեություն սկսել Հայաստանում:
Դեսպան Արտաշես Թումանյանը ողջունեց ընկերության ներկայացուցիչների պատրաստակամությունը Հայաստանում տնտեսական գործունեություն ծավալելու վերաբերյալ և խոստացավ անհրաժեշտության դեպքում աջակցություն ցուցաբերել:
«Telka Mobin Sanat» ընկերության ներկայացուցիչներին փոխանցվեցին Հայաստանի զարգացման հիմնադրամի տվյալները՝ Հայաստանում տնտեսական գործունեության իրականացման հետ կապված խնդիրները քննարկելու նպատակով:
Ընկերության ներկայացուցիչներին փոխանցվեցին տեղեկատվական նյութեր ՀՀ տնտեսության, առանձին ծրագրերի, օրենսդրության և Մեղրիի ազատ տնտեսական գոտու վերաբերյալ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր