Դեսպանի հանդիպումն Իրանի ազգային թանգարանի տնօրենի հետ

29 հունվարի, 2017

Հունվարի 29-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն այցելեց Իրանի ազգային թանգարան և հանդիպեց թանգարանի տնօրեն Ջաբրաիլ Նոքանդեի հետ: Քննարկվեցին «Հայաստանի պատմության թանգարանի և Իրանի ազգային թանգարանի միջև հայ-իրանական մշակութային ժառանգության ցուցահանդեսի կազմակերպման մասին» Փոխըմբռնման հուշագրի պահանջներից բխող առաջիկա անելիքները:
ՀՀ դեսպանն առաջարկեց քննարկել և իրականացնել Հայաստանում և Իրանում երկու թանգարանների ցուցահանդեսների կազմակերպումը: Մասնավորապես, առաջարկվեց 2017 թ. սեպտեմբեր-հոկտեմբեր ամիսներին առաջին ցուցահանդեսը կազմակերպել Իրանում:
Կողմերը նշեցին, որ դա չափազանց կարևոր դեր կկատարի հայկական մշակույթն ու պատմությունն Իրանում ներկայացնելու տեսանկյունից և նպատակահարմար կլինի ցուցահանդեսն անցկացնել երկու կողմերի պետական մարմինների բարձր ներկայացուցչության պայմաններում:
Ջ. Նոքանդեն խոստացավ մեկ-երկու օրվա ընթացքում հայկական կողմին ներկայացնել հիշյալ ծրագրի իրականացման հարցում Իրանի ազգային թանգարանի առաջարկները:
Հանդիպմանը մասնակցեցին ԻԻՀ-ում ՀՀ դեսպանության խորհրդական Սահակ Եղիազարյանը, թարգմանիչ Նորայր Մեհրաբյանը և Իրանի ազգային թանգարանի արտաքին կապերի պատասխանատու Մասումե Ահմադին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր