Դեսպան Թումանյանի հանդիպումը «IRNA» լրատվական գործակալության տնօրենի հետ

10 մարտի, 2018

Մարտի 10-ին ԻԻՀ-ում ՀՀ դեսպան Արտաշես Թումանյանը հանդիպեց «IRNA» լրատվական գործակալության նորանշանակ տնօրեն Զիյա Հաշեմիի հետ:

Ողջունելով ՀՀ դեսպանին՝ Զ. Հաշեմին ջերմորեն վերհիշեց մի քանի տարի առաջ Երևան կատարած իր այցը՝ որպես Թեհրանի համալսարանի դասախոս: Խոսելով իրանահայ համայնքի մասին՝ նա բարձր գնահատեց համայնքի ներկայացուցիչների ունեցած դերն Իրանում:

Ընդգծելով գիտության ոլորտում Հայաստանի ունեցած բարձր մակարդակը՝ Զ. Հաշեմին կարևորեց գիտական համագործակցության զարգացումը:

Վերջինս նաև անդրադարձավ մշակութային կապերի ամրապնդման անհրաժեշտությանն՝ իր պատրաստակամությունը հայտնելով «IRNA»-ի հնարավորությունները ծառայեցնել ի նպաստ Իրանում Հայաստանի մասին տեղեկատվության տարածման և իրազեկվածության մակարդակի բարձրացման:

Շնորհակալություն հայտնելով հանդիպման համար՝ դեսպան Ա. Թումանյանը իր գոհունակությունը հայտնեց «IRNA»-ի հետ հաստատված աշխատանքային համագործակցության կապակցությամբ: ՀՀ դեսպանն անդրադարձավ 2017 թ. հոկտեմբերի 21-ին Թեհրանում ստորագրված «Արմենպրեսի» և «IRNA»-ի միջև համագործակցության հուշագրին՝ նշելով, որ կողմերը հստակ քայլեր են ձեռնարկում դրա իրականացման համար:

Զրուցակիցներն անհրաժեշտ համարեցին հետևողականորեն շարունակել երկու երկրներում փոխճանաչողության մակարդակի բարձրացման ուղղությամբ աշխատանքները:

Հանդիպման ընթացքում նաև քննարկվեց Երևանում և Թեհրանում «Արմենպրեսի» և «IRNA»-ի ներկայացուցչությունների բացման հարցը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր