Դեսպան Թումանյանի այցն Արևելյան Ատրպատական նահանգ

22 մայիսի, 2018

Մայիսի 22-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն աշխատանքային այցով մեկնել է Իրանի Արևելյան Ատրպատական նահանգ, որտեղ հանդիպումներ է ունեցել տեղական ինքնակառավարման մարմինների, հասարակական և գործարար շրջանակաների ներկայացուցիչների հետ:

Նահանգապետ Մաջիդ Խոդաբախշի հետ հանդիպման ընթացքում դեսպան Թումանյանը ներկայացրել է Հայաստան-Իրան հարաբերությունների ներկա վիճակը, խոսել է ՀՀ և ԵՄ-ի քաղաքական, տնտեսական ընթացիկ հարաբերությունների, ներքին և արտաքին քաղաքականության ոլորտներում ՀՀ նոր ղեկավարության հռչակած մոտեցումների, ինչպես նաև օրերս ԵԱՏՄ-ի և Իրանի միջև համաձայնագրի ստորագրումից հետո տնտեսական կապերի խորացման հնարավորությունների և Հայաստանի բարենպաստ գործարար միջավայրում ներդրումային ծրագրերի իրականացման ուղիների մասին:

Նահանգապետը ներկայացրել է Արևելյան Ատրպատականի տնտեսական հնարավորությունները և հայտնել է իրանական կողմի պատրաստակամությունը երկկողմ հարաբերությունների հետագա զարգացման հարցում:

Արևելյան Ատրպատականում դեսպան Թումանյանը հանդիպում է ունեցել Թավրիզի ուրբաթօրյա աղոթապետ Սեյեդ Մոհամադ Ալի Ալ-Հաշեմի հետ և ներկայացրել է ՀՀ արտաքին քաղաքականության կարևորագույն ուղղությունները՝ հատուկ անդրադառնալով Ղարաբաղյան հիմնախնդրի խաղաղ կարգավորման գործընթացին:

Զրուցակիցները խոսել են հայ և իրանցի ժողովուրդների դարավոր բարեկամության, Արևելյան Ատրպատականի հայ համայնքի կենսագործունեության և մի շարք երկկողմ հետաքրքրություն ներկայացնող այլ հարցերի մասին:

Արևելյան Ատրպատականի Առևտրի, արդյունաբերության, հանքերի և գյուղատնտեսության պալատի նախագահ Սամադ Հասանզադեի և նահանգի տնտեսական մի շարք ասոցիացիաների ղեկավարներ ու բազմաթիվ գործարարների հետ հանդիպման ընթացքում դեսպան Թումանյանը հանգամանորեն ներկայացրել է ՀՀ կողմից իրականացվող տնտեսական քաղաքականությունը, խոսել է ԵԱՏՄ-ի, ԵՄ-ի և մի շարք այլ երկրների ու կառույցների հետ Հայաստանի հարաբերությունների առանձնահատկությունների, ինչպես նաև Հայաստան-Իրան տնտեսական կապերի ընդլայնման ու խորացման ուղղությամբ ստեղծված մեծ հնարավորությունների մասին:

Թավրիզի համալսարանի ռեկտոր Մոհամադ Ռեզա Փուր Մոհամադիի հետ հանդիպման ընթացքում ՀՀ դեսպանը ներկայացրել է Հայաստանում կրթության և գիտության ոլորտում իրականացվող ծրագրերը: Դեսպան Թումանյանը հատուկ անդրադարձ է կատարել բարձր և տեղեկատվական տեխնոլոգիաների ոլորտում Հայաստանի ձեռքբերումներին և իրանական կողմին առաջարկել է հիշյալ ոլորտներում խորացնել համագործակցությունը:

Զրուցակիցներն անդրադարձել են Հայաստանի և Իրանի ԲՈՒՀ-երում կրթության առանձնահատկություններին, ինչպես նաև համատեղ գիտահետազոտական ծրագրերի իրականացման հնարավորություններին:

Թավրիզում ՀՀ դեսպանն այցելել է նաև մի շարք արտադրական ձեռնարկություններ (օդորակիչների արտադրության, սննդարդյունաբերական և գորգագործական ընկերություններ), որտեղ ծանոթացել է վերջիններիս արտադրական հնարավորություններին և ներկայացրել է Հայաստանում տնտեսական գործունեություն ծավալելու առավելությունները:

Դեսպան Թումանյանը Թավրիզում այցելել է Ատրպատականի Հայոց թեմի առաջնորդարան, որտեղ հանդիպել է Թեմի առաջնորդ Գրիգոր Եպս. Չիֆթճյանի և տեղի իրանահայ համայնքի ներկայացուցիչների հետ: Զրուցակիցները մտքեր են փոխանակել Հայաստան-Իրան հարաբերությունների ներկա վիճակի, դրանց հետագա զարգացման հեռանկարների և մի շարք այլ հարցերի շուրջ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր