Մաշտոցյան Մատենադարանում կայացել է «ՊԱՏԿԵՐԻ ՊՈԵԶԻԱՆ» խորագրով հայ-իրանական միջազգային գիտաժողովը

21 մարտի, 2024

Մարտի 21-ին Մաշտոցյան Մատենադարանում կայացել է «ՊԱՏԿԵՐԻ ՊՈԵԶԻԱՆ» խորագրով հայ-իրանական միջազգային գիտաժողովը։

Ողջույնի խոսքով հանդես են եկել Մատենադարանի տնօրեն Արա Խզմալյանը, ՀՀ ԿԳՄՍ նախարարի տեղակալ Արթուր Մարտիրոսյանը, Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Ն.Գ. Մեհդի Սոբհանին և Մատենադարանի արևելագիտության բաժնի ավագ գիտաշխատող Իվեթ Թաջարյանը։

Երկու երկրների միջև գործակցությունը որակապես նոր հարթության վրա դնելու վճռականությունը փոխադարձ է։ 2024 թ. հունվարի 26-31-ն առաջին անգամ պաշտոնական այցով Իրանում գտնվող Մատենադարանի պատվիրակությունը՝ լինելով կարևորագույն ձեռագրական կենտրոններում, հանդիպելով գրավոր ժառանգության պահպանման, ուսումնասիրման և հանրահռչակման պատասխանատուների հետ, անմիջապես նախաձեռնեց «Պատկերի պոեզիան» հայ-իրանական երկօրյա գիտաժողով, որը նվիրված է իրանահայ նկարիչ Անդրե Սևրուգյանի ծննդյան 130-ամյակին:

Առաջիկայում նախատեսվում է Սևրուգյանին նվիրված առանձին ցուցադրություն, որ կիրականացվի Մայր Աթոռ Սուրբ Էջմիածնի և այլ թանգարանների համագործակցությամբ:

Գիտաժողովին համերգային ծրագրով ելույթ է ունեցել «Հանանե» իրանական ժողովրդական համույթը։

Բարեկամ երկու ժողովուրդների պատմական ու գրական առնչությունների, անցյալի ընդհանրությունների ու մշակութային երկխոսության լավագույն օրինակների շուրջ էին մեկ տասնյակից ավելի թեմատիկ զեկույցները: Ռ. Զալ «Շահնամեից»՝ «Սասնա ծռեր». հոր և որդու կռիվը, «Հայերի մասին լեգենդները պարսկական 6-րդ դարի բանաստեղծություններում», «Կնոջ կերպարը 20-րդ դարի իրանահայ կերպարվեստում», «Անդրե Սևրուգյանի՝ որպես նորարար նկարչի տեղը իրանական գեղանկարչության մեջ», «Մատենադարանի գեղագիտական աշխատանքների դասակարգումը» և այլ բազում արժեքավոր զեկույցներ ներկայացրել են հայ և իրանցի բանախոսներ՝ Մատենադարանից, Իրանի Ֆարհանգյան, Իմամ Խոմեյնիի անվ.միջազգային, Թեհրանի, Հունգարիայի Պետեր Պազմանի անվան կաթոլիկ, Չինաստանի Սոչժոուի համալսարաններից:

https://matenadaran.am/2024/03/21/%d5%b4%d5%a1%d5%b7%d5%bf%d5%b8%d6%81%d5%b5%d5%a1%d5%b6-%d5%b4%d5%a1%d5%bf%d5%a5%d5%b6%d5%a1%d5%a4%d5%a1%d6%80%d5%a1%d5%b6%d5%b8%d6%82%d5%b4-%d5%b4%d5%a5%d5%af%d5%b6%d5%a1%d6%80%d5%af%d5%a5%d5%ac/

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր