ՀՀ դեսպանի հանդիպումները Թեհրանի հայ համայնքի ներկայացուցիչների հետ

18 մարտի, 2015

ՀՀ դեսպանի հանդիպումները Թեհրանի հայ համայնքի ներկայացուցիչների հետ
-Մարտի 10-ին ՀՀ դեսպան Արտաշես Թումանյանը դեսպանությունում ընդունել է Հայոց Ցեղասպանության 100-ամյա տարելիցի միջոցառումները համակարգող Թեհրանի Հայոց Թեմի հանձնախմբի նախագահ Արմենուշ Առաքելյանին: Քննարկվել են Հայոց Ցեղասպանության 100-ամյա տարելիցին նախատեսված միջոցառումների կազմակերպման խնդիրները:
-Մարտի 15-ին ՀՀ դեսպան Արտաշես Թումանյանը հանդիպել է Թեհրանի Հայոց Թեմի առաջնորդ Սեպուհ արքեպիսկոպոս Սարգսյանի հետ: Կարծիքներ են փոխանակվել դեսպանություն-համայնք համագործակցության, համայնքային կյանքին առնչվող հարցերի շուրջ:
-Մարտի 15-ին Թեհրանի Հայոց ակումբի սրահում տեղի է ունեցել ՀՀ նորանշանակ դեսպան Արտաշես Թումանյանի և դեսպանության դիվանագիտական անձնակազմի հանդիպումը Թեհրանի Հայոց Թեմի ներկայացուցիչների հետ: Հանդիպման ընթացքում բազմաթիվ ներկաներ շնորհավորանքի և ողջույնի խոսքերով հանդես եկան՝ աշխատանքային բեղուն գործունեություն մաղթելով դեսպանին: Շնորհակալություն հայտնելով ջերմ շնորհավորանքների համար, դեսպան Ա. Թումանյանը նշեց, որ մեծ է հայ համայնքի դերը հայ-իրանական բարեկամական հարաբերությունների ամրապնդման գործում: Նա ներկայացրեց երկու երկրների հարաբերությունների ներկա վիճակը, ինչպես նաև առաջիկայում Հայաստան-Իրան հարաբերությունների զարգացման հեռանկարները, կոնկրետ ծրագրերի իրականացման խնդիրները:
-Մարտի 17-ին ՀՀ դեսպան Արտաշես Թումանյանը դեսպանությունում հանդիպել է Իրան-Հայաստան առևտրային պալատի նախագահ Լևոն Ահարոնյանի հետ: Ողջունելով և բարեմաղթանքներ հնչեցնելով նորանշանակ դեսպանի հասցեին, Լ. Ահարոնյանն առաջարկել է ակտիվացնել հայ-իրանական առևտրատնտեսական կապերը: Դեսպան Ա. Թումանյանը շնորհակալություն է հայտնել պալատի անդամներին մինչ օրս կատարած աշխատանքի համար և հորդորել է նրանց առավելագույն ուշադրություն դարձնել ՀՀ-ում ներդրումներ կատարելու և երկու երկրների միջև առևտրային հարաբերություններն աշխուժացնելու հարցին: Ա. Թումանյանը պարզաբանումներ է տվել մի շարք բարենպաստ գործոնների մասին (Եվրասիական Տնտեսական Միությանը Հայաստանի անդամակցություն, Իրանի միջուկային ծրագրի շուրջ ընթացող բանակցություններ):
-Մարտի 18-ին ՀՀ դեսպան Արտաշես Թումանյանը դեսպանությունում հանդիպել է ԻԻՀ մեջլիսի պատգամավոր Ռոբերտ Բեգլարյանի հետ: Զրուցակիցները քննարկել են հայ-իրանական միջպետական հարաբերությունների ներկա վիճակի և դրա բարելավման, ինչպես նաև տնտեսական կապերի արդյունավետության բարձրացմանը վերաբերող հարցեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր