Դեսպան Թումանյանի այցը «GERAD» ընկերություն

14 մայիսի, 2016

Մայիսի 14-ին ԻԻՀ-ում ՀՀ դեսպան Արտաշես Թումանյանն այցելեց իրանական «GERAD» ընկերության կարի արտադրական ձեռնարկություն:
Այցի ընթացքում Ա. Թումանյանը ծանոթացավ ձեռնարկության արտադրական գործընթացներին: Ընկերության հիմնադիր Էսֆահանիանը և տնօրեն Հոսեյնին ներկայացրին ձեռնարկության տնտեսական գործունեությունը և առաջիկա ծրագրերը:
Դեսպան Թումանյանն ընկերության ղեկավարության և մասնագետներին ծանոթացրեց Հայաստանի թեթև արդյունաբերության ոլորտի վիճակին, ինչպես նաև Հայաստանում գործարար միջավայրի և հատկապես օտարերրկրյա ներդրումների համար ստեղծված բարենպաստ պայմաններին: Առանձին անդրադարձ եղավ Հայաստանի Եվրասիական Տնտեսական Միության անդամակցությանը, մի բան, որ ընդլայնում է արտադրանքի արտահանման հնարավորությունները, նկատի ունենալով տվյալ միության 180 միլիոնանոց բնակչությամբ շուկայի առկայությունը: ՀՀ դեսպանը ներկայացրեց նաև Հայաստանի՝ որոշ երկրների և միությունների հետ ունեցած արտոնյալ առևտրային ռեժիմները:
Պայմանավորվածություն ձեռք բերվեց Իրանի հագուստ արտադրողների ասոցիացիայի մի շարք անդամների հետ այցելել Հայաստան՝ տեղում ծանոթանալու արտադրական ծրագրի իրականացման պայմաններին: Ա. Թումանյանը հավաստիացրեց, որ ՀՀ դեսպանությունը կաջակցի Հայաստանում տնտեսական գործունեության իրականացման ծրագրերին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր