Դեսպան Արտաշես Թումանյանի հանդիպումը Իրանի արվեստների տան գործադիր տնօրենի հետ

17 մայիսի, 2016

Մայիսի 17-ին Իրանի արվեստագետների տանը տեղի ունեցավ ԻԻՀ-ում ՀՀ դեսպան Արրտաշես Թումանյանի հանդիպումը Իրանի արվեստների տան գործադիր տնօրեն Մաջիդ Ռաջաբի Մեմարի հետ:
Ռաջաբի Մեմարը ներկայացրեց Իրանի արվեստագետների տան աշխատանքը մշակույթի տարբեր ոլորտներում: Արվեստագետների տան կազմում ընդգրկված են ութսուն հազարից ավել անդամներ, ովքեր ակտիվորեն մասնակցում են կազմակերպված միջոցառումներին, այդ թվում նաև այլ երկրների հետ մշակութային համատեղ ծրագրերին: Ռաջաբի Մեմարը իր պատրաստակամությունը հայտնեց Հայաստանի հետ մշակութային համագործակցության ակտիվացման գործում:
ՀՀ դեսպանը պատմեց Հայաստանում մշակութային կյանքի և այդ ոլորտում կառավարության ու հայկական կազմակերպությունների գործունեության մասին: Ա. Թումանյանը անդրադարձավ մի շարք ոլորտների (գրականություն, թատրոն, կինո երաժշտություն, գեղանկարչություն և այլն), որտեղ մեծ հնարավորություններ կան հայ-իրանական համագործակցությունը խորացնելու առումով: Ներկայացվեց մինչև հիմա կատարված աշխատանքը և տեսակետներ հայտնվեցին առաջիկա ծրագրերի մասին:
Կողմերը խոսեցին առանձին ծրագրերի, փոխայցելությունների, համատեղ միջոցառումների կազմակերպման մասին: Ա. Թումանյանը պատրաստակամություն հայտնեց աջակցելու Իրանի արվեստագետների տան կողմից կազմակերպվող Իրանում կրոնական ուղղություններին առնչվող (իսլամ, քրիստոնեություն, զրադաշտականություն, հուդայականություն) մշակութային կոնգրեսի կազմակերպմանը:
Պայմանավորվածություն ձեռք բերվեց առաջիկայում հաստատել ՀՀ դեսպանության և Իրանի արվեստագետների տան համատեղ միջոցառումների ծրագիր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր