Թեհրանում անցկացված Հայաստան էքսպո 2016 թ. ցուցահանդեսի կարևոր արդյունքներից մեկը

16 նոյեմբերի, 2016

Ս.թ. հոկտեմբերի 5-8-ին Թեհրանում անցկացված «Հայաստան էքսպո» ցուցահանդեսի ընթացքում բազմաթիվ գործարար հանդիպումների մեջ իր կարևորությամբ առանձնանում էր ՀՀ դեսպանության կողմից կազմակերպված Հարավկովկասյան երկաթուղի «ՀԿԵ» ընկերության ղեկավարության և Իրանի տրանսպորտային ընկերությունների ֆեդերացիայի պատվիրակության հանդիպումը:
Ցուցահանդեսի շրջանակներում «ՀԿԵ» ընկերության գլխավոր տնօրեն Սերգեյ Վալկոն հանդիպումներ ունեցավ Իրանի արդյունաբերության նախարարի տեղակալի, մաքսային, երկաթուղային և մի շարք տրանսպորտային կազմակերպությունների ղեկավարների հետ:
Քննարկումների առարկան «Հյուսիս-հարավ» տրանսպորտային միջանցքի Հայաստանով անցնող ծրագիրն էր, որը ենթադրում է փոխադրումների իրականացում երկաթուղային և ավտոտրանսպորտային միջոցների օգտագործմամբ:
Հարկ է նշել, որ այսօր արդեն ստացվել է այդ քննարկումների առաջին արդյունքը: Հայկական, եվրոպական, վրացական և իրանական համապատասխան կառույցների հետ համագործակցությամբ «ՀԿԵ»-ի կողմից առաջին անգամ կազմակերպվել է 40 ֆուտանոց կոնտեյների տարանցիկ մուլտիմոդալ փոխադրում Եվրոպայից Իրան: Կոնտեյներն անցել է Գերմանիա-Կոստանցա նավահանգիստ-Փոթի-Հայաստան (Երասխ կայարան), որտեղից էլ այն ավտոտրանսպորտով տեղափոխվել է մինչև Թեհրան:
Անհրաժեշտ է նշել, որ Փոթիից մինչև «Երասխ» կայարան (հաշվի առնելով կոնտեյների տեղաշարժը և համապատասխան կայարաններում փաստաթղթային ձևակերպումները) կոնտեյների տեղափոխությունը տևել է ընդամենը 38 ժամ:
Տրանսպորտային փոխադրումների չափանիշների տեսանկյունից արդյունքները գոհացուցիչ են, իսկ տվյալ միջանցքի գործարկման արդյունավետության ընդհանուր գնահատականը կախված է բեռնափոխադրումների սպասվող հոսքերի մեծությունից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր