Դեսպան Թումանյանն ընդունեց «SAIPA» ընկերության ներկայացուցիչներին

30 հունվարի, 2017

Հունվարի 30-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն ընդունեց «SAIPA» ավտոմեքենաշինական ընկերության արտաքին կապերի գծով գլխավոր կառավարիչներ Մ. Աբթահիին և Մ. Աբբասփուրին:
Հանդիպման ընթացքում դեսպան Թումանյանը հյուրերին ներկայացրեց Հայաստանում ներդրումային ծրագրերի իրականացման պայմանները: Մասնավորապես, խոսվեց Հայաստանի՝ ԵԱՏՄ անդամակցությամբ պայմանավորված առավելությունների մասին, որոնք թույլ են տալիս հայաստանյան ցանկացած արտադրանք զրոյական մաքսատուրքով ներմուծել ԵԱՏՄ մյուս երկրներ:
«SAIPA» ընկերության արտաքին կապերի գծով պատասխանատուները նշեցին, որ ընկերությունը նպատակադրված է Հայաստանում բացել ներկայացուցչություն, հիմնել արտադրական կենտրոն, որի արդյունավետ գործարկմամբ հնարավորություն կստեղծվի ազատ մուտք գործել ԵԱՏՄ երկրների շուկա: Ընկերության ներկայացուցիչները խնդրեցին դեսպանից աջակցել հայկական կողմի հետ կապերի հաստատմանը:
Դեսպան Արտաշես Թումանյանը ողջունեց «SAIPA» ընկերության՝ Հայաստանում գործունեություն ծավալելու ծրագիրը՝ խոստանալով հնարավոր բոլոր միջոցներով օժանդակել այդ նախաձեռնությանը: Դեսպանի կողմից նաև նշվեց, որ ներդրումային ծրագիր ներկայացնելու դեպքում ՀՀ կառավարությունը կարող է քննարկել արտոնություններ տրամադրելու հարցը:
Ընկերության ներկայացուցիչներին փոխանցվեցին Հայաստանի զարգացման հիմնադրամի տվյալները՝ Հայաստանում տնտեսական գործունեության իրականացման հետ կապված խնդիրները քննարկելու նպատակով, ինչպես նաև տեղեկատվական նյութեր ՀՀ տնտեսության, առանձին ծրագրերի, օրենսդրության և Մեղրիի ազատ տնտեսական գոտու մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր