Այց մարմնամտային խանգարումներով հայ երեխաներին օժանդակող «Ակունք» կենտրոն

02 հոկտեմբերի, 2017

Հոկտեմբերի 2-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն իր տիկնոջ՝ Անահիտ Շահվերդյանի հետ այցելեց Թեհրանի մարմնամտային խանգարումներով հայ երեխաներին օժանդակող «Ակունք» կենտրոն, որտեղ տարբեր խնդիրներ ունեցող 35 անձ ամենօրյա հաճախելիության պայմաններում անց է կացնում իր առօրյան: «Ակունքի» սաներին մատուցվում են վերականգնողական, ուսումնական, ինչպես նաև կենցաղային ծառայություններ:
Oժանդակող կենտրոնի տնօրինությունը (տնօրեն՝ Անգինե Մարգարյան) և մասնագետները մեծ բարեխղճությամբ և բարձր արհեստավարժությամբ կատարում են իրենց դժվարին, բայց շնորհակալ աշխատանքը: Կենտրոնում տիրում է բարության, ընտանեկան ջերմության և համերաշխության մթնոլորտ:
Այցելության վերջում տեղի ունեցավ հանդիպում «Ակունք» կենտրոնի աշխատակազմի հետ, որի ընթացքում տնօրեն Անգինե Մարգարյանը ներկայացրեց հաստատության ստեղծման պատմությունը, գործունեության ոլորտները և առաջիկա ծրագրերը:
Հանդիպումներին մասնակցեցին նաև ԻԻՀ-ում ՀՀ դեսպանության խորհրդական Սահակ Եղիազարյանը և դեսպանության երրորդ քարտուղար Ռուդիկ Յարալյանն՝ իրենց կանանց հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր