Դեսպան Թումանյանն ընդունեց Հայաստան մեկնած լրագրողներին

24 դեկտեմբերի, 2017

Դեկտեմբերի 24-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն ընդունեց դեկտեմբերի 18-ից 21-ը Հայաստան գործուղված իրանական լրատվամիջոցների ներկայացուցիչներին՝ ԻԻՀ մշակութային ժառանգության, զբոսաշրջության և ձեռնարվեստի կազմակերպության լրագրող Մ. Ջալիվանդֆարին, «Համշահրի» օրաթերթի լրագրող Մ. Բարիքանիին, Իրանի ռադիոհեռուստատեսության լրագրող Ս. Սարավանիին, օպերատոր Ս. Էբրահիմիին, լրատվական հեռուստաալիքի լրագրող Է. Գ. Օրիմիին, օպերատոր Հ. Հ. Մեյբոդիին, ինչպես նաև լրագրողներ Փ. Աթաշսանաթին և Մ. Սալեհին:

Լրագրողներն իրենց երախտագիտությունը հայտնեցին ՀՀ Զբոսաշրջության պետական կոմիտեին և ԻԻՀ-ում ՀՀ դեսպանությանը սույն այցելությունը կազմակերպելու համար: Նրանք կիսվեցին Հայաստանից ստացած իրենց տպավորություններով և ներկայացրեցին առաջիկա օրերին համապատասխան լրատվամիջոցներով (հեռուստատեսություն, ռադիո, թերթեր, համացանցային ռեսուրսներ) տեղեկատվական-քարոզչական նյութերի տարածման իրենց ծրագրերը:

Լրագրողների խումբը կարճ ժամանակահատվածում հասցրել էր լինել ՀՀ պատմության, Ս. Փարաջանովի անվան թանգարաններում, Ծաղկաձորի ձմեռային օլիմպիական կենտրոնում, մշակութային և սպորտային մի շարք այլ կազմակերպություններում, Երևանի գեղատեսիլ վայրերում:

Հանդիպման ընթացքում լրագրողներն արեցին օգտակար դիտողություններ և առաջարկություններ:

Դեսպան Թումանյանը շնորհակալություն հայտնեց լրագրողներին կատարած աշխատանքի համար, խոստացավ հետագայում հաշվի առնել նրանց բոլոր նկատառումները և շարունակել համագործակցությունն այս և երկկողմ հարաբերությունների համար կարևոր այլ ոլորտներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր