ՀՀԿ-ի պատվիրակության մասնակցությունը ICAPP-ի Մետաքսի ճանապարհին նվիրված 2-րդ հատուկ կոնֆերանսին

04 փետրվարի, 2018

Փետրվարի 1-4-ը Ասիական քաղաքական կուսակցությունների միջազգային համաժողովի (ICAPP) կողմից կազմակերպված Մետաքսի ճանապարհին նվիրված 2-րդ հատուկ կոնֆերանսին մասնակցելու նպատակով Թեհրանում էր գտնվում Հայաստանի Հանրապետական կուսակցության պատվիրակությունը՝ ՀՀ ԱԺ արտաքին հարաբերությունների մշտական հանձնաժողովի փոխնախագահ Հերմինե Նաղդալյանի և պատգամավոր Միհրան Հակոբյանի մասնակցությամբ:
Միջոցառման բացման արարողությունը տեղի ունեցավ Իրանի միջազգային համաժողովների կենտրոնում, որին մասնակցում էր ԻԻՀ-ում ՀՀ դեսպան Արտաշես Թումանյանը և դեսպանության անձնակազմի անդամները:
Բացմանը ելույթներով հանդես եկան ԻԻՀ ԱԳ նախարարի քաղաքական հարցերով տեղակալ Աբաս Արաղչին, ICAPP-ի հիմնադիր նախագահ, Ֆիլիպինների Ներկայացուցիչների պալատի նախկին խոսնակ Խոսե դե Վենեսիան, իրանական «Իսլամական Կոալիցիա» («Մոթալեֆե») կուսակցության գլխավոր քարտուղար Մոհամմադ Նաբի Հաբիբին և այլ գործիչներ:
Միհրան Հակոբյանը ելույթ է ունեցել «Քաղաքական կուսակցությունները և կայուն քաղաքային զարգացումը» խորագրով նիստի ընթացքում՝ անդրադառնալով քաղաքային զարգացման մի շարք խնդիրներին և ժամանակակից միտումներին:
Հերմինե Նաղդալյանը «Քաղաքական կուսակցությունների դերը Մետաքսի ճանապարհի գոտու քաղաքական և սոցիալական զարգացման մեջ» խորագրով նիստին անդրադարձել է Մետաքսի ճանապարհի միջազգային տրանսպորտային տարանցիկ ուղու տարածաշրջանային և գլոբալ նշանակությանը, ինչպես նաև վերջինիս մեջ Հայաստանի ներգրավման հնարավորություններին:
ՀՀ ԱԺ պատգամավորների ելույթները լուսաբանվել է IRNA լրատվական գործակալության կողմից:
ՀՀԿ-ի ներկայացուցիչները հանդիպումներ են ունեցել կոնֆերանսին մասնակից Ասիական երկրների քաղաքական կուսակցությունների ներկայացուցիչների, ICAPP-ի հիմնադիր նախագահ Խոսե դե Վենեսիայի և Ասիական խորհրդարանական վեհաժողովի գլխավոր քարտուղար Մոհամմադ Ռեզա Մաջիդիի հետ: Հանդիպումների ընթացքում ICAPP-ի անդամ կուսակցությունների ներկայացուցիչները դրականորեն են արձագանքել ՀՀԿ-ի ICAPP-ին անդամակցության ցանկությանը:
Ասիական խորհրդարանական վեհաժողովի գլխավոր քարտուղար Մ. Ռեզա Մաջիդին ՀՀ ԱԺ պատգամավորների հետ հանդիպմանը իր պատրաստակամությունը է հայտնել Ասիական խորհրդարանական վեհաժողովին ՀՀ Ազգային ժողովի անդամակցությանն աջակցելու հարցում:
Թեհրան այցի ավարտին Հերմինե Նաղդալյանը և Միհրան Հակոբյանը այցելել են Թեհրանի Հայոց Թեմ և հանդիպել թեմի առաջնորդ Սեպուհ արքեպիսկոպոս Սարգսյանի հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր