Դեսպան Թումանյանը հանդիպեց ԻԻՀ ԱԳ փոխնախարարի հետ

22 ապրիլի, 2018

Ապրիլի 22-ին ԻԻՀ-ում ՀՀ դեսպան Արտաշես Թումանյանը հանդիպեց ԻԻՀ ԱԳ նախարարի տեղակալ Ղոլամռեզա Անսարիի հետ:

Խոսելով տնտեսական հարաբերությունների զարգացման ուղղությամբ դեսպանության իրականացրած աշխատանքների մասին՝ դեսպան Ա. Թումանյանը նշեց, որ վերջին ժամանակաշրջանում գործնական լուրջ հարաբերություններ են հաստատվել ԻԻՀ տնտեսական ոլորտը համակարգող պետական մարմինների և կազմակերպությունների հետ: Նա տեղեկացրեց, որ դեսպանությունը կապեր է հաստատել Իրանի բոլոր առևտրային պալատների հետ և այցելություններ են իրականացվում Իրանի նահանգներ, որտեղ ներկայացվում է ՀՀ տնտեսության հնարավորությունները:

Ինչպես նկատեց դեսպան Ա. Թումանյանը, մինչ այժմ կազմակերպվել են բազմաթիվ իրանցի գործարարների այցեր Հայաստան, և այդ գործընթացը կրում է շարունակական բնույթ:

ԻԻՀ ԱԳ փոխնախարարը ներկայացրեց ներկա փուլում Իրանի արտաքին գերատեսչությունում տեղի ունեցող կառուցվածքային փոփոխությունները և իրենց կողմից որդեգրված տնտեսական դիվանագիտությունը:

Ղ. Անսարին անդրադարձավ Հայաստանի տարածքով ապրանքների տարանցման, իրանցի գործարարների կողմից ՀՀ-ում գյուղատնտեսության և այլ ոլորտներում ներդրումների իրականացման, ինչպես նաև Հայաստան-Իրան առևտրաշրջանառության ծավալների մեծացման խնդիրներին:

Հանդիպման վերջում ՀՀ դեսպանը ներկայացրեց վերջին օրերին ՀՀ-ում տիրող ներքաղաքական վիճակը՝ նշելով, որ բողոքի ակցիաներն ունեն խաղաղ բնույթ, և իշխանությունները ցուցաբերում են հավասարակշռված վերաբերմունք: Ա. Թումանյանը համոզմունք հայտնեց, որ հետագայում ևս կբացառվի բռնի ուժի գործադրումը, և սկիզբ առած քաղաքական գործընթացները կունենան խաղաղ հանգուցալուծում:

ՀՀ դեսպանը նաև հավելեց, որ տեղի ունեցող զարգացումները որևէ կերպ կապված չեն արտաքին ուժերի ազդեցության հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր