Գրքի շնորհանդես «Չահարմահալ» միությունում

19 հունիսի, 2018

Հունիսի 19-ին Թեհրանի «Չահարմահալ» միության Հ. Թումանյանի անվան դահլիճում տեղի ունեցավ ԻԻՀ-ում ՀՀ դեսպանության կողմից կազմակերպված գրական-գեղարվեստական միջոցառում՝ նվիրված իրանահայ գրող Վարանդի «Ժամանակակից պարսից պոեզիա. ակներ ակներև» անթոլոգիա-գրքի շնորհանդեսին, որը պարունակում է ժամանակակից պարսից գրականության շուրջ 100 ստեղծագործության թարգմանություն:

Հատկանշական է, որ 2017 թ. իրանահայ գրողը ժամանակակից պարսից պոեզիային նվիրված վերոնշյալ աշխատությամբ մասնակցել է Հայաստանի գրողների միության և Մայր Աթոռ Սբ. Էջմիածնի հովանու ներքո անցկացվող «Կանթեղ» մրցանակաբաշխությանն՝ արժանանալով թարգմանական գլխավոր մրցանակի:

Միջոցառման ընթացքում հնչեցված իր ելույթում Վարանդը հանգամանորեն ներկայացրեց իր ստեղծագործությունը, խոսեց «Կանթեղ» մրցանակաբաշխության և իրանահայ համայնքի գրական-մշակութային կյանքին առնչվող մի շարք խնդիրների մասին:

Ելույթով հանդես եկավ նաև ԻԻՀ-ում ՀՀ արտակարգ և լիազոր դեսպան Արտաշես Թումանյանը՝ շնորհավորելով Վարանդին և բարձր գնահատելով նրա կատարած աշխատանքը: Ա. Թումանյանը հատուկ անդրադարձ կատարեց Հայաստան-Իրան հարաբերությունների տիրույթում միջմշակութային կապերի ամրապնդմանն՝ ընդգծելով երկու ժողովուրդների մշակութային արժեքները միմյանց հավուր պատշաճի ներկայացնելու կարևորությունը:

Բեմից հնչեցին Վարանդի հեղինակած մի շարք ստեղծագործություններ և պարսից բանաստեղծության քառյակներ:

Ներկաների շարքում էին Իրանի գրական-մշակութային ոլորտի գործիչներ, իրանահայ ազգային կառույցների ներկայացուցիչներ, արվեստագետներ և այլ հրավիրյալներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր