Դեսպան Թումանյանի այցն Իրանի Ֆարս նահանգ

15 հոկտեմբերի, 2018

Հոկտեմբերի 14-15-ին ԻԻՀ-ում ՀՀ արտակարգ և լիազոր դեսպան Արտաշես Թումանյանը երկօրյա աշխատանքային այցով մեկնել է Ֆարս նահանգ:

Նահանգապետ Էսմայիլ Թաբադարի հետ հանդիպման ժամանակ կողմերը քննարկել են Հայաստանում տնտեսական գործունեություն իրականացնելու, արդյունաբերության, գյուղատնտեսության, ՏՏ և բարձր տեխնոլոգիաների, ինչպես նաև զբոսաշրջության և մշակույթի ոլորտներում համագործակցության խորացման հնարավորությունները:

Ֆարսի առևտրի, արդյունաբերության, հանքերի և գյուղատնտեսության պալատում դեսպան Թումանյանը հանգամանալից կերպով ներկայացրել է Հայաստանի տնտեսության վիճակը, Իրանի հետ տնտեսական համագործակցության պայմանները, Հայաստանի գործարար միջավայրը բնութագրող ցուցանիշները:

ԵԱՏՄ երկրների հետ փոխգործակցության համատեքստում ՀՀ դեսպանը խոսել է Հայաստան-Իրան հարաբերությունների խորացման կարևորության մասին, ներկայացրել ՀՀ նոր կառավարության հակակոռուպցիոն քաղաքականությունը և նահանգի գործարար շրջանակների ներկայացուցիչներին առաջարկել այցելել Հայաստան՝ տեղում ծանոթանալու տնտեսական գործունեության հնարավորություններին:

Հանդիպման վերջում իրանցի գործարարները բազմաթիվ հարցեր են ուղղել ՀՀ դեսպանին, որոնց կապակցությամբ տրվել են համապատասխան մեկնաբանություններ և բացատրություններ: Պալատի ղեկավարությանը և գործարարներին փոխանցվել են տեղեկատվական, քարոզչական նյութեր Հայաստանի տնտեսության առանձին ոլորտների և ներդումային ծրագրերի մասին:

Նահանգային այցի շրջանակներում դեսպան Թումանյանը եղել է Շիրազի համալասարանում, որտեղ տեղի է ունեցել հանդիպում համալսարանի փոխնախագահ Ալիռեզա Աֆշարիֆարի հետ: Վերջինս ներկայացրել է համալսարանի գիտակրթական գործունեությունը, խոսել հաստատված միջազգային կապերի, ուսանողների և դասախոսների փոխանակման ծրագրերի մասին:

Դեսպան Թումանյանը զրուցակցին ներկայացրել է ՀՀ կրթության ոլորտը, մասնավորապես հայաստանյան ԲՈւՀ-երի գործունեությունը: Պայմանավորվածություն է ձեռք բերվել Շիրազի համալսարանից պատվիրակություն գործուղել Հայաստան՝ միջբուհական համագործակցության հնարավորություններին տեղում ծանոթանալու նպատակով:

ՀՀ դեսպանն այցելել է նաև Ֆարս նահանգի մի շարք արդյունաբերական ձեռնարկություններ և ծանոթացել դրանց գործունեությանը:

Դեսպան Թումանյանը եղել է Շիրազի «Հայ ակումբում», որտեղ տեղի է ունեցել հանդիպում հայ համայնքի ներկայացուցիչների հետ:

ՀՀ դեսպանը և նրան ուղեկցող անձնակազմն այցելել են Պերսեպոլիս պատմամշակութային հնավայր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր