Դեսպան Թումանյանը հյուրընկալեց «Paya Saman Pars» ընկերության ներկայացուցիչներին

23 հոկտեմբերի, 2018

Հոկտեմբերի 23-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն ընդունեց «Paya Saman Pars» ընկերության ներկայացուցիչներին:

Հյուրերն անդրադարձան ընկերության գործունեության հիմնական ուղղություններին, որոնք են՝ ճանապարհաշինությունը և շինանյութերի արտադրությունը: Ընկերության գործադիր տնօրեն Մ. Շահսավարին տեղեկացրեց, որ իրենց մասնագետներն ուսումնասիրել են ՀՀ դեսպանության կողմից իրենց տրամադրված նյութերը՝ մասնավորապես կապված Հայաստանի հյուսիս-հարավ ավտոճանապարհի ծրագրի հետ, և պատրաստ են հնարավոր համագործակցության խնդիրների շուրջ Հայաստանում սկսել համապատասխան քննարկումներ:

Դեսպան Ա. Թումանյանը նշեց, որ ինքը, նախկինում հանդիպելով հիշյալ ընկերության հիմնադիրների հետ, քննարկել էր մի շարք ուղղություններով համագործակցության հնարավորությունները: Նա հայտնեց իր պատրաստակամությունն աջակցել «Paya Saman Pars» ընկերությանը Հայաստանում գործունեություն ծավալելու հարցում:

ՀՀ դեսպանը նաև որոշ հավելյալ տեղեկություններ փոխանցեց իր զրուցակիցներին Հայաստանում ճանապարհաշինության ոլորտում իրականացվող աշխատանքների մասին:

Հանդիպման արդյունքում համաձայնություն ձեռք բերվեց իրանական ընկերության ներկայացուցիչներին գործուղել Հայաստան՝ տեղում աշխատանքային հանդիպումներ և քննարկումներ ունենալու համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր