Դիվանագետների այցը «Թարբիյաթ Մոդարես» համալսարան

25 հոկտեմբերի, 2018

Հոկտեմբերի 25-ին ԻԻՀ-ում ՀՀ դեսպանության աշխատակիցներ Արթուր Հակոբյանը և Գարիկ Գրիգորյանը հանդիպում ունեցան «Թարբիյաթ Մոդարես» համալսարանի (Tarbiat Modares University) միջազգային գիտական համագործակցության վարչության տնօրեն, էլեկտրոնային ինժեներիայի դոցենտ Համիդ Սայիդիի և ուսանողների հարցերով բաժնի ղեկավար, արդյունաբերական բիոտեխնոլոգիայի պրոֆեսոր Աբաս Շոջաօսադաթիի հետ:

Հ. Սայիդին ներկայացրեց «Թարբիյաթ Մոդարես» համալսարանի գործունեությունը՝ նշելով, որ համալսարանը Լեյդենի վարկանիշային աղյուսակում զբաղեցնում է 400-րդ տեղը, իսկ ներիրանական վարկանիշով՝ առաջին հնգյակում է: Համալսարանն ունի նաև սեփական տեխնոլոգիական պարկը:

Ա. Հակոբյանը խոսեց Հայաստանում գործող առաջատար բուհերի և գիտության զարգացած ճյուղերի, մասնավորապես՝ ՏՏ, բժշկական կրթության, ճարտարապետաշինարարական, ինժեներական, երաժշտագիտության և գեղարվեստի ոլորտների մասին:

Նա առաջարկեց ԻԻՀ-ում ՀՀ դեսպան Արտաշես Թումանյանի ներկայացմամբ «Թարբիյաթ Մոդարես» համալսարանի միջազգային հարաբերությունների ֆակուլտետի ուսանողների համար կազմակերպել ՀՀ արտաքին քաղաքականության վերաբերյալ դասախոսություն, որն արժանացավ դրական արձագանքի:

Հանդիպումից հետո ՀՀ դեսպանության աշխատակիցները շրջայց կատարեցին համալսարանում՝ ծանոթանալով բիոտեխնոլոգիական լաբորատորիայի աշխատանքներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր