ՀՀ դեսպանի այցն Արևելյան Ատրպատական նահանգ

04 դեկտեմբերի, 2019

Դեկտեմբերի 3-ին ԻԻՀ-ում ՀՀ արտակարգ և լիազոր դեսպան Արտաշես Թումանյանն այցելեց Արևելյան Ատրպատական նահանգ: Այցի ընթացքում ՀՀ դեսպանի ղեկավարած պատվիրակությանն ընդունեց նահանգապետ Մոհամադ Ռեզա Փուրմոհամադին:

Հանդիպման ընթացքում քննարկվեցին Հայաստան-Իրան հարաբերություններին առնչվող հարցերի լայն շրջանակ: Մասնավորապես, անդրադարձ եղավ առևտրի և փոխադարձ ներդրումների ոլորտում նահանգային մարմինների և տնտեսվարողների առաջիկա անելիքներին: Քննարկվեցին մշակութային և զբոսաշրջային համագործակցության խորացման խնդիրները:

Նահանգի առևտրի, արդյունաբերության, հանքերի և գյուղատնտեսության պալատում տեղի ունեցած հանդիպմանը մասնակցեց շուրջ հարյուր գործարար: Դեսպան Ա. Թումանյանը ներկայացրեց Հայաստանի տնտեսական վիճակը, գործարար և ներդրումային միջավայրը: ՀՀ դեսպանն առանձնահատուկ անդրադարձ կատարեց ԵԱՏՄ-Իրան ազատ առևտրի համաձայնագրի ընձեռած հնարավորություններին:

Հանդիպման ավարտին Ա. Թումանյանը պատասխանեց գործարարների հարցերին, ներկայացվեցին Հայաստանին վերաբերող տեսահոլովակներ, և ներկաներին տրամադրվեցին քարոզչական-տեղեկատվական նյութեր:

Օրվա ընթացքում ՀՀ դեսպանն այցելեց մի շարք արտադրական ձեռնարկություններ, ծանոթացավ վերջիններիս արտադրական-տեխնիկական կարողություններին և քննարկեց Հայաստանի հետ առևտրատնտեսական ծրագրերի իրականացման հնարավորությունները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր